Mae arfordir Sir Benfro yn ardal gymhleth. Ceir yn y sir 186 milltir
o arfordir, sy’n rhan o unig Barc Cenedlaethol arfordirol y DU.
Mae dyfroedd gyda'r glannau, arfordir ac ardaloedd arforol cyfagos Sir
Benfro yn bwysig yn genedlaethol ac yn rhyngwladol o ran cadwraeth natur
a thirlun. Mae’r sir hefyd yn gartref i un o brif borthladdoedd
olew Ewrop a dwy derfynfa fferi, yn ogystal â diwydiannau pwysig
twristiaeth, amaethyddiaeth a physgota – maent yn hanfodol bob
un i economi’r sir.
Mae llu o sefydliadau a defnyddwyr yn nodweddu’r rhyngwyneb rhwng
yr adnoddau amgylcheddol hyn a’r gweithgareddau economaidd lleol.
Nid yw’r rhain wedi’u hintegreiddio a phrin yw’r cydweithio
rhyngddynt; ni cheir fforwm unedig ar gyfer dadlau a chyfnewid gwybodaeth,
a gwan yw eu gallu i ddatrys anghydfod a chynnal strwythurau adeiladu
consensws.
Sefydlwyd Fforwm Arfordir Sir Benfro i ddechrau mynd i’r afael
â’r problemau hyn trwy weithio â phawb, gyda’r
nod o wrando, cydlynu, darparu gwybodaeth a thywys.
FFORWM ARFORDIR SIR BENFRO
Sefydlwyd Fforwm Arfordir Sir Benfro yn swyddogol fis Mai 2000. Dechreuodd y tîm ar eu gwaith amser llawn o Ragfyr 2001, yn dilyn cwblhau cais Amcan Un yn llwyddiannus, a daethant ag amrywiaeth o fudd-ddeiliaid o’r sectorau cyhoeddus, preifat a gwirfoddol ynghyd. Mae’r holl bartneriaid yn gweithio i hybu dull cynaladwy o drin y gwaith o gynllunio, rheoli, defnyddio a datblygu Parth Morol cyfan Sir Benfro.
FAINT O’R SIR Y MAE
FFORWM ARFORDIR SIR BENFRO YN EI CHWMPASU?
Gan nad yw’r rhan fwyaf o Sir Benfro fwy nag ychydig filltiroedd o’r môr, a chan fod llawer o weithgareddau ar y tir ac ar y môr yn gallu dylanwadu ar y parth morol, y mater dan sylw fydd yn pennu pa ardal y mae Fforwm Arfordir Sir Benfro yn ei chwmpasu. Er enghraifft, fe all rheoli nentydd/afonydd mewndirol yn wael effeithio ar y dyfroedd arfordirol; gall arferion pysgodfeydd alltraeth effeithio ar reolaeth pysgodfeydd gyda’r glannau.
NODAU
FFORWM ARFORDIR SIR BENFRO
Mae Fforwm Arfordir Sir Benfro yn hybu dull cynaladwy a strategol o drin gwaith cynllunio, rheoli, defnyddio a datblygu parth morol Sir Benfro, i sicrhau bod ei hasedion naturiol, diwylliannol, ac economaidd yn cael eu cynnal a'u gwella er lles a mwynhad y genhedlaeth hon a chenedlaethau'r dyfodol.
SUT Y GALLWN GYFLAWNI’R NODAU HYN?
Mae dwy
ran i waith Fforwm Arfordir Sir Benfro. Y cyntaf yw rhedeg y Fforwm
o ddydd i ddydd. Dan y rhaglen Amcan Un gyfredol, mae tîm Fforwm
Arfordir Sir Benfro yn ymwneud ag amrywiaeth o Brosiectau a Gweithgareddau
sydd o fudd i’r arfordir, ac yn galluogi’r Fforwm i gasglu
llawer iawn o wybodaeth.
Mae hyn yn ei dro yn darparu gwybodaeth ar gyfer nod tymor hir Fforwm
Arfordir Sir Benfro, sef llunio strategaeth rheoli a chynllun gweithredu
ar gyfer yr arfordir a’r ddyfrffordd leol.
BUDDION
FFORWM ARFORDIR SIR BENFRO
Mae bod â sefydliad fel Fforwm Arfordir Sir Benfro yn y sir yn
creu nifer o fuddion ar gyfer yr unigolyn yn ogystal ag ar gyfer sefydliadau
statudol a gwirfoddol.
Mae’n creu strwythur hyblyg sy'n annog ymwneud a chydweithrediad pob buddgarfan ar bob lefel ac, ar yr un pryd, mae'n galluogi sefydliadau i gwtogi ar ddyblygu gwaith, amser ac adnoddau.
Mae’n darparu gwybodaeth ddiweddar ar faterion cyfredol heb unrhyw gost i’r defnyddiwr, ac mae’n gwella dealltwriaeth o sefydliadau eraill a’r cyhoedd.
Mae’n cynyddu amlygrwydd arfordir a dyfrffordd Sir Benfro a materion cysylltiedig, yn y sir a thu hwnt iddi.
Mae’n darparu cwmpas ar gyfer datblygu partneriaethau newydd i rannu adnoddau ac arbenigedd, gan leihau costau, ac yn helpu i ddatblygu partneriaethau mwy cynhwysol. Mae'n bosibl y bydd cyrff ariannu yn fwy hael o'r herwydd.
