Fe all Fforwm Arfordir Sir Benfro nodi materion arfordirol trwy ei ymwneud â nifer o weithgareddau. Dyma ambell un ohonynt.

Y COD MOROL
Mae defnyddwyr cychod ar draws y sir wedi bod yn treialu cod morol sydd newydd ei greu ar gyfer Sir Benfro.
Fforwm Arfordir Sir Benfro fu’n cydlynu’r cynllun, ac fe gasglwyd y wybodaeth ar ei gyfer gan y defnyddwyr cychod eu hunain.
Mae holl berchnogion cychod siartredig y sir ar gyfer teithiau plymio am fywyd gwyllt yn dilyn set o ganllawiau. Nod y canllawiau yw cyfyngu ar darfu ar fywyd gwyllt ar lwybrau poblogaidd twristiaeth forol.
Ceir codau ymddygiad sy’n ymwneud â morloi, dolffiniaid, morfilod, llamidyddion ac adar y môr, yn ogystal â mapiau parthu ar gyfer y mannau mwyaf sensitif a chanllawiau ar rywogaethau morol eraill megis crwbanod môr, heulforgwn a heulbysgod.
Adolygir y Cod Morol hwn dros y gaeaf, a’i wneud yn ffurfiol ar gyfer dechrau’r tymor nesaf.

GRŴP AWYR AGORED SIARTREDIG SIR BENFRO
Daw’r grŵp Awyr Agored Siartredig â nifer o sefydliadau at ei gilydd i weithio mewn partneriaeth ac i ddatblygu gweithgareddau awyr agored mewn ffordd gynaladwy, gan sicrhau bod yr amgylchedd naturiol yn cael ei warchod. Mae Fforwm Arfordir Sir Benfro yn darparu’r prif gyswllt ar gyfer y prosiect hwn ar hyn o bryd.

YMGYRCH CADW CYMRU'N DACLUS
Fel aelod o’r grŵp llywio mae Fforwm Arfordir Sir Benfro yn cefnogi gwaith Ymgyrch Cadw Cymru’n Daclus. Mae yna ddau brosiect penodol sydd yn berthnasol i waith y Fforwm.

Y Cynllun Gofal Arfordirol: Mae hwn yn annog grwpiau ac unigolion i rannu’r gwaith o reoli’r arfordir drwy fabwysiadu traethau lleol a chanolbwyntio ar y gofal parhaus y mae ei angen arnynt.

Yr Arfordir Gwyrdd: Mae hyn yn canolbwyntio ar reoli traethau gwledig â dŵr o ansawdd da mewn ffordd sy’n sensitif tuag at yr amgylchedd.

Mae'r ddau brosiect yn gymorth i sicrhau bod Arfordir Sir Benfro'n cael ei reoli’n gynaladwy, ac felly'n cyflawni nodau Fforwm Arfordir Sir Benfro.

CYNGHORFEYDD ARFORDIROL
Bydd Fforwm Arfordir Sir Benfro yn cynnal y rhain yn rheolaidd mewn gwahanol fannau ar hyd a lled Sir Benfro. Byddant yn rhoi’r cyfle i unrhyw un ddod i weld y tîm ac i gael sgwrs anffurfiol ynghylch unrhyw fater neu bryder ynglŷn â’r arfordir.