Gyda 1200km o arfordir garw, yn darparu hinsawdd gwynt a thonnau ynni uchel a’r amrediad llanw ail uchaf yn y byd, mae Cymru’n gartref i adnodd ynni adnewyddadwy cyfoethog.

Mae gan ddyfroedd Cymru botensial aruthrol o ran cynhyrchu ynni glân, adnewyddadwy, ac yn Sir Benfro rydym eisoes yn gweld datblygiadau cyffrous yn y sector – mae cynlluniau ar gyfer ffermydd gwynt arnofiol yn y Môr Celtaidd wedi hen ddechrau…ac mae Porthladd Aberdaugleddau yn symud tuag at statws porth rhydd; offeryn pwerus i hybu’r economi leol. 

Yn y cyfeiriadur isod, gallwch ddysgu mwy am y sefydliadau niferus sydd eisoes yn gweithio tuag at ddyfodol ynni Sir Benfro.

Bydd sicrhau bod ein cymunedau’n cael gwybod am y cyfleoedd niferus y mae’r diwydiant ynni adnewyddadwy morol yn eu cyflwyno ac yn gallu manteisio arnynt yn hanfodol i’w lwyddiant yma yn Sir Benfro.

Ond mae’n rhaid i ni hefyd gydnabod y risgiau – a fydd y prosiectau hyn yn goresgyn y rhwystrau y mae’n rhaid iddynt eu hwynebu a bwrw ymlaen fel y cynlluniwyd? A fydd ein cymunedau lleol yn gweld y manteision a’r gwobrau? A fydd unrhyw effeithiau digroeso eraill?

Gyda’n gilydd fel aelodau o’r gymuned, sefydliadau a busnesau lleol, mae’n rhaid i ni baratoi ar gyfer y buddion, lleihau’r risgiau lle bo’n bosibl a gwneud popeth o fewn ein gallu i sicrhau y gall ein cymunedau ffynnu a bod ein harfordir yn gallu aros yn lle arbennig i fywyd gwyllt.

Byddwn yn diweddaru’r dudalen hon yn rheolaidd gydag offer ac adnoddau i chi eu rhannu gyda’ch cymunedau fel y gallwn harneisio’r cyfle hwn gyda’n gilydd a pharatoi’r ffordd ar gyfer dyfodol cynaliadwy, llewyrchus i Sir Benfro.